Matloob Warraich

آلو و سبزیوں کے کاشتکار رُل گئے

Dated: 06-Jan-2026

آلو پاکستان میں بھی بے حد پسند کیا جاتا ہے اور دنیا بھر میں بھی اس کی مقبولیت کسی تعارف کی محتاج نہیں۔ یہ کبھی بطور مکمل سبزی استعمال ہوتا ہے اور کبھی کسی دوسری سبزی کے ساتھ معاون کے طور پر، جبکہ گوشت کے ساتھ مل کر اس کا ذائقہ مزید دوبالا کر دیتا ہے۔ اگر آلو میٹھا ہو تو اسے شکرقندی یا سویٹ پوٹیٹو کہا جاتا ہے۔ اگرچہ دونوں شکل و صورت میں ملتے جلتے ہیں اور زمین کے اندر پیدا ہوتے ہیں، مگر غذائی اعتبار سے دونوں میں فرق ہے۔ آلو میں نشاستہ بڑی مقدار میں پایا جاتا ہے، اسی لیے ڈاکٹروں کی جانب سے شوگر کے مریضوں کو اس کے زیادہ استعمال سے منع کیا جاتا ہے۔
تاریخی اعتبار سے آلو کا تعلق جنوبی امریکا، خصوصاً پیرو کے علاقوں سے ہے، جہاں اسے پانچ سے آٹھ ہزار سال قبل دریافت کیا گیا۔ یورپ میں آلو نسبتاً بہت دیر سے پہنچا، کیونکہ امریکا اور جنوبی امریکا خود بھی یورپ کے لیے دیر سے دریافت ہوئے۔ جب یہ خطے دریافت ہوئے تو وہاں کے پھل، سبزیاں اور پودے بتدریج دنیا کے دوسرے حصوں تک پہنچے۔
یورپ میں جب آلو جرمنی، فرانس، اٹلی، سوئٹزرلینڈ، بیلجیم اور ہالینڈ پہنچا تو ابتدا میں اسے فوری مقبولیت حاصل نہ ہو سکی، کیونکہ لوگ اسے جانوروں کے چارے کے طور پر استعمال کرتے تھے۔ اس وقت انہیں یہ اندازہ نہیں تھا کہ آلو کے اندر کتنی غذائی اہمیت پوشیدہ ہے اور یہ کس قدر کارآمد غذا بن سکتا ہے۔ یہی حال ٹماٹر کا بھی رہا، جسے یورپ میں ایک عرصے تک نقصان دہ سمجھا گیا اور یہ خیال کیا جاتا تھا کہ اس کے استعمال سے کینسر ہوتا ہے۔ اٹلی میں تو ایک طویل عرصے تک ٹماٹر کو ممنوع قرار دیا گیا، ٹماٹر کو ایک زہریلا پھل سمجھتے ہوئے سزائے موت کے مجرموں کو بھی کھلایا جاتا تھا۔ حالانکہ آج اٹلی اور پوری دنیا میں پاستا، پیزا اور دیگر کھانوں میں ٹماٹر کا سب سے زیادہ استعمال ہوتا ہے اور اٹلی دنیا کے بڑے ٹماٹر استعمال کرنے والے ممالک میں شمار ہوتا ہے۔ہالینڈ اور بیلجیم میں آج بھی جگہ جگہ آلو کے اسٹال نظر آتے ہیں، خاص طور پر سردیوں میں، جہاں گرم گرم آلو مختلف انداز میں پیش کیے جاتے ہیں، جیسے چپس، فرنچ فرائز اور دیگر اقسام کی ڈشز۔ جرمنی میں آلو کو کدوکش کر کے ٹکیوں کی صورت میں کیچپ کے ساتھ پیش کیا جاتا ہے۔ سولہویں اور سترہویں صدی میں، یعنی آج سے تقریباً تین چار سو سال قبل، آلو اسپین کے راستے یورپ میں داخل ہوا، کیونکہ امریکا کو دریافت کرنے والے ہسپانوی ہی وہاں سے پھل اور سبزیاں یورپ لے کر آئے تھے۔ اسی لیے کہا جا سکتا ہے کہ یورپ میں آلو کا تعارف اسپین کے ذریعے ہوا۔
یورپ سے آلو ایشیا، وسطی ایشیا، جنوبی ایشیا اور ہمارے برصغیر تک پہنچا۔ پاکستان میں آتے ہی اس نے تیزی سے مقبولیت حاصل کی۔ جیسے جیسے لوگوں کو اس کے فوائد کا علم ہوتا گیا، آلو ہر گھر کا لازمی حصہ بنتا چلا گیا۔ یہ سبزی کے ساتھ بھی پک جاتا ہے اور یہاں تک کہ کئی شوقین لوگ اسے دال کے ساتھ بھی شوق سے کھا لیتے ہیں۔بلکہ آج بھی آلو گوشت اور آلوئوں والے پراٹھے ہم سب کی مرغن غذا ہے۔
ذاتی تجربہ بھی اس بات کی گواہی دیتا ہے۔ جب تعلیم کے لیے پاکستان سے نکل کر سوئٹزرلینڈ پہنچے اور دو ماہ بعد گھر فون کیا تو والدہ نے کہا کہ بیٹے، مجھے اور کوئی فکر نہیں، بس یہ فکر ہے کہ تمہیں وہاں آلو ملتا ہے یا نہیں۔ جواب میں بتایا کہ امی، آپ کبھی یہاں آئیں تو دیکھیں گی کہ پاکستان میں جتنی اقسام کے آلو ہم نے کبھی نہیں دیکھیں، یہاں اس سے کہیں زیادہ ہیں، اور انہیں بنانے کے طریقے بھی بے شمار ہیں۔ اس پر والدہ نے مسکرا کر کہا کہ پھر تو تم وہیں ٹک جاؤ گے، اور واقعی آلو ہی وہ ذائقہ تھا جس نے ہمیں پردیس میں بھی اپنا پن محسوس کروا دیا۔لیکن آلو صرف ذائقے کا نام نہیں، یہ کسان کی محنت، اس کی امید اور اس کے خواب کا نام بھی ہے۔ جب کاشتکار کسی زمین میں آلو بوتا ہے تو اس کا مطلب یہ ہوتا ہے کہ وہ زمین زرخیز اور فصل دینے کی صلاحیت رکھتی ہے۔ آلو کی کاشت کے لیے زمین کو نہایت باریک اور ہموار کیا جاتا ہے، پھر اس میں بیج رکھا جاتا ہے۔ جو لوگ کھیتی باڑی سے واقف ہیں وہ جانتے ہیں کہ آلو کی فصل میں غیر معمولی محنت درکار ہوتی ہے۔ ایک زمیندار پورا سیزن، یعنی چار سے پانچ ماہ، اس امید پر گزار دیتا ہے کہ اسی فصل سے وہ بیٹی کی شادی کرے گا، آڑھتی کے قرض اتارے گا اور گھر کے اخراجات پورے کرے گا۔
آلو، کپاس اور گندم وہ اجناس ہیں جن کا ہماری دیہی زندگی پر گہرا اثر ہوتا ہے۔ بدقسمتی سے پاکستان میں معلومات کی کمی اور حکومتی سطح پر مناسب رہنمائی نہ ہونے کے باعث اکثر کسان درست اندازہ نہیں لگا پاتے۔ یوں جٹ اور زمیندار معمولی سی غلط حساب کتاب کا شکار ہو جاتے ہیں۔ ایک سال آلو کی قیمت دو سو روپے فی کلو تک پہنچ جائے تو اگلے سال تقریباً ہر کسان اپنی زمین پر آلو ہی کاشت کر لیتا ہے۔ زیادہ زمین والا زیادہ اور کم زمین والا کم، مگر سب کی کوشش یہی ہوتی ہے کہ پچھلے سال کی قیمت سے فائدہ اٹھایا جائے۔نتیجتاً اگلے سال آلو کی پیداوار ضرورت سے کہیں زیادہ ہو جاتی ہے اور قیمت زمین بوس ہو جاتی ہے۔ جب آلو کی بھرمار ہوتی ہے تو باردانہ ناپید ہو جاتا ہے، یعنی وہ بوریاں جن میں آلو بھرا جاتا ہے، مہنگی ہو جاتی ہیں۔ سستا آلو مہنگے باردانے میں ڈال کر سٹوریج کرنا کسان کے لیے مزید نقصان کا باعث بنتا ہے۔ ایک بوری کو پانچ یا چھ ماہ کے لیے اسٹور میں رکھنے پر بھاری اخراجات آتے ہیں۔ پٹوائی، چنوائی، باردانہ، اسٹوریج اور ٹرانسپورٹ کے اخراجات مل کر کسان کی کمر توڑ دیتے ہیں، اور منڈیوں میں اتنی بڑی مقدار میں آلو آ جاتا ہے کہ ’’آلو، آلو ہو جاتا ہے‘‘۔
ایک قومی سروے کے مطابق 2025 میں آلو کی برآمدات کا سپورٹ گراف مکمل طور پر زیرو لیول پر آ چکا ہے۔ چالیس فیصد سے سیدھا صفر پر آ جانا کسی بھی زرعی معیشت کے لیے ایک بہت بڑا المیہ ہوتا ہے۔ مسئلہ صرف یہ نہیں کہ آلو افغانستان کو نہیں جا رہا، بلکہ حقیقت یہ ہے کہ یہی آلو اسی راستے سے آگے تاجکستان، ازبکستان، روس، جارجیا اور آذربائیجان تک پہنچتا تھا۔ جب یہ سلسلہ ٹوٹا تو اس کے اثرات پورے خطے میں محسوس کیے گئے۔اس صورتحال میں نقصان صرف پاکستانی کسان کا نہیں ہوا، بلکہ پاکستان، افغانستان اور ان تمام ممالک کا بھی ہوا جہاں یہ فصل نہیں پہنچ سکی۔ وسائل ضائع ہوئے، محنت رائیگاں گئی اور سب سے بڑھ کر کسانوں کی امیدیں ٹوٹ گئیں۔ پہلے پاکستان طویل عرصے سے افغانستان اور ایران کو آلو اور دیگر سبزیاں برآمد کرتا رہا، جبکہ افغانستان سے پاکستان کو انار، سیب اور دیگر پھل درآمد ہوتے تھے۔ اس دوطرفہ تجارت سے دونوں ملکوں کے عوام، خصوصاً کسانوں کو فائدہ ہوتا تھا، مگر جب تعلقات کشیدہ ہوئے اور سرحدی بندشیں بڑھیں تو یہ فطری تجارتی سلسلہ تقریباً ختم ہو گیا۔
آج صورتحال یہ ہے کہ پاکستان کے بیشتر کولڈ اسٹوریج بھر چکے ہیں، آلو کی وہ بوری جو گزشتہ سال 2600 روپے میں بکتی تھی، اب 600 روپے میں بھی نہیں اٹھتی۔ گوبھی، شلجم اور دیگر سبزیاں کسان جانوروں کو کھلانے پر مجبور ہو چکا ہے۔ پہلے گندم، پھر چاول، پھر گنا اور کپاس، اور اب آلو بھی کسان کے ہاتھ سے نکل چکا ہے۔کسان سیاست نہیں سمجھتا، نہ سرحدی جھگڑوں سے اسے غرض ہوتی ہے۔ وہ صرف زمین کا سینہ چیر کر بیج بوتا ہے اور امید کرتا ہے کہ شاید اس فصل سے اس کے بچوں کا مستقبل بہتر ہو جائے۔ یہی حال افغانستان کے کسانوں کا بھی ہے، جو پھل اگا کر پاکستان بھیجتے تھے اور آج وہ بھی شدید نقصان میں ہیں۔ سیاسی فیصلوں کی قیمت دونوں طرف کے کسان ادا کر رہے ہیں۔
اب سوال یہ ہے کہ کرنا کیا چاہیے؟ کاشتکاری اب صرف بیج بونے کا نام نہیں رہی، یہ ایک مکمل سائنس بن چکی ہے۔ حکومت کو متبادل تجارتی راستے تلاش کرنا ہوں گے، پیشگی قیمتوں کا اعلان کرنا ہوگا، جامع زرعی پالیسی بنانی ہوگی، فیلڈ انسپکٹرز کو متحرک کرنا ہوگا، کولڈ اسٹوریج کی سہولیات بڑھانی ہوں گی اور کسان کو براہِ راست منڈی تک رسائی دینا ہوگی۔میں خود ایک کسان کا بیٹا ہوں اور برسوں سے یہ بات کہہ رہا ہوں کہ کسان کے جیتے جی اس کے لیے کچھ کرو۔ ہر دو تین سال بعد سیلاب آتا ہے اور جو تھوڑا بہت بچتا ہے وہ بہا لے جاتا ہے۔ ڈیم، نہریں اور حفاظتی نظام کب بنیں گے؟ کیا تب، جب سب کچھ ختم ہو جائے گا؟ کیونکہ اگر کسان ہار گیا تو یہ صرف ایک فصل کا نقصان نہیں ہوگا، یہ پورے ملک کی شکست ہوگی۔
معزز قارئین! ہمارے قریبی ہمسایہ ملک بھارت میں پنجاب کے کسانوں نے اپنی حکومت کی کسان دشمن پالیسیوں کے خلاف اڑھائی سال کے دورانیے پر مشتمل احتجاج کیا اور جس نے پنجاب، ہریانہ ،ہماچل اور دارالحکومت دہلی کو محسور کرکے رکھ دیا۔ اس دوران سات سو کسانوں کو اپنی جان سے ہاتھ دھونا پڑے ۔ بالآخر نریندرمودی سرکار نے گھٹنوں کے بل جھک کر حکومتی شکست تسلیم کر لی اور کسان فتح یاب ٹھہرے۔ ہمارے کسانوں کے پُرامن احتجاج کو حکومتی سطح پر پذیرائی ملنی چاہیے اور نئے دور کے جدید تقاضوں کے مطابق نئی زرعی پالیسیاں بننی چاہئیں کیونکہ کسان خوشحال ہوگا تو عوام خوشحال ہو گی۔

Column Name

Matloob

Warraich

Matloob

Warraich

Matloob

Warraich

ADDRESS

QUICK LINKS

Newsletter