Matloob Warraich

ذوالفقار علی بھٹوکی سالگرہ ۔جیالے عہد کریں

Dated: 04-Jan-2014

مطلوب احمد وڑائچ
matloobwarraich@yahoo.com
کل کی حکمران اور آج کی پستیوں کی گہرائی میں گری ہوئی پاکستان پیپلز پارٹی اپنے بانی چیئرمین شہید ذوالفقار علی بھٹوکا یوم ولادت تو منارہی ہے لیکن آج گزشتہ سالوں کی طرح جوش وخروش دیکھنے میں نہیں آرہا۔پیپلز پارٹی اقتدار میں آئی تو اس کے کو چیئرمین آصف علی زرداری نے کہا تھا اب  وزیر اعظم ہائوس ،ایوان صدر اور گورنر ہائو س میں جئے بھٹو کے نعرے لگیں گے ۔ہم سمجھے کہ زرداری صاحب کا نعرے لگنے کا مطلب بھٹو  کے فکرو فلسفے سے رہنمائی لینا اور ان کے مشن کی تکمیل ہے ۔لیکن مایوسی اس وقت ہوئی جب بھٹو کے نام نہاد جانشینوں کا اپنا مشن واضح ہوا ۔ انہوں لوٹ مار کرپشن ایسا کلچر ایجاد کیا کہ مسند نشیں لیڈروں کی ذاتی دولت کے ہمالیہ جیسے انبار لگ گئے۔  جن کے نیچے دب کر عام آدمی کے لئے جسم اور سانس کا رابطہ رکھنا ناممکن ہو گیا ۔معیشت ڈبو دی اور ملکی سالمیت دائو پر لگا دی گئی۔ اداروں کی اینٹ سے اینٹ بجا دی گئی ۔ میں اپنے کاروبار کے سلسلے میں یورپ میں موجود ہوں۔سابق حکومت کی عوام کش پالیسیوں کے باعث بیرون ِ ممالک میں موجود جیالوں کا ہاتھ میرے گریبان تک بھی آجاتا تھا ، یہ جانے بغیر کہ میں پیپلزپارٹی میں تو ضرور ہوں لیکن میراحکومتی پالیسیوں سے کوئی تعلق نہیں تھا ،میں ان جیالوں میں سے ہوں جن کی قربانیوں کو قیادت نے بری طرح فراموش کرتے ہوئے کھڈے لائن لگا رکھا تھا۔جیالوں کے ساتھ ایسا سلوک شہید محترمہ بے نظیر بھٹو نے کیانہ بانی چیئرمین شہید ذوالفقار علی بھٹو نے کیا۔شہید باپ بیٹی نے کارکنوں کو عزت دی بدلے میں کارکنوں اور جیالوں نے اپنی جانوں تک دے دیں۔اب جبکہ وفادار کارکنوں اور جیالوں کو نظر انداز کرکے دوسری پارٹیوں سے لیڈرشپ مستعار لے کر لوٹا کریسی کی حوصلہ افزائی کی گئی ۔ملک کو بحرانوں میں دھکیل کر عوام کو ناراض کردیا گیا۔جیالوں کو  فراموش کر کے ناراض کردیا گیا۔ جس کا نتیجہ مئی 2013ء کے انتخابات میں بدترین شکست کی شکل میں دیکھ لیا ۔
عوام مخالف پالیسیوں،کارکنوںکو احترام دینے کے حوالے سے اورقومی مفادات پر کمپروز مائز کو دیکھتے ہوئے لگتا نہیں کہ یہ شہیدوں کی پارٹی ہے۔حب الوطنی کے حوالے سے میری پارٹی کے رہنمائوںکی سوچ اقتدار میں رہتے ہوئے بھی ذوالفقار علی بھٹوکی جیل کی سوچ سے مختلف تھی۔ اگر ان کو قوم و وطن سے محبت ہوتی تو قومی وسائل کو اس بے دردی سے نہ لوٹا جاتا کہ ہر ادارہ کنگال ہوگیا ۔آج حب الوطنی کا شہکار وہ خط میرے سامنے ہے جو شہید بھٹو نے پھانسی کی کال کوٹھڑی سے جولائی 1978کوفرانس کے صدر جسکارڈ کو لکھا تھا۔اس کی عبار ت جناب بھٹو کے ان جذبات کی ترجمانی کرتی نظر آتی ہے جو وہ عام حالات میں اپنی قوم اور ملک کے بارے میں رکھتے تھے اس خط سے جناب بھٹو کے بارے میں کئے گئے اس دعوے کی بھی تائید ہوتی ہے کہ وہ موت کی کال کوٹھڑی میں بھی صرف ملک اور قوم کے بارے میں ہی سوچتے رہے۔اس خط سے بھی سابق حکمرانوں نے کوئی رہنمائی نہ لی جو بھٹوز کے نام اور ان کی قربانیوں کی وجہ سے اقتدار میں آئے تھے ۔
( یہ خط ’’دی ہندوستان ٹائمز‘‘ نے اپنی 16 اپریل 1979ء کی اشاعت میں رائٹر کے حوالے سے شائع کیاتھا)ملاحظہ کیجئے۔
’’اگر موت کی اس کال کوٹھڑی سے جس پر سخت ترین حفاظتی پہرہ ہے ہاتھ باہر نکالنا اتنا مشکل نہ ہوتا تو میں آپ کو اپنے جذبات سے آگاہ کرنے کے لئے بہت پہلے رابطہ کرنے کی کوشش کرتا۔اس وقت جب کہ میں زندگی اور موت کے ترازو میں جھول رہا ہوں، مسٹر صدر آپ جانتے ہیں میرا فخر اور دل کی سچائی آپ کے مفکرانہ لگا? کے نتیجے میں ممنونیت کے اظہار پر پیش رقت مجبور کر رہی ہے خواہ کچھ بھی ہو لیکن میں یہ کہنا ضرورت سمجھتا ہوں کہ ایک معصوم آدمی کی عزت بچانے کے لئے آپ نے جس تردد کا مظاہرہ کیا ہے اس سے آپ اور آپ کے ملک کے عوام نے پاکستانیوں کے دل جیت لئے ہیں۔فرانس 1781ء سے پہلے خاص طور پر اور اس کے بعد عام طور پر مغربی تہذیب کا عظیم مرکز رہا ہے۔ لگ بھگ 1958ء تک فرانس جنت کی نظیر بنا رہا ہے۔ اس سے پہلے مجھے یورپ کے بارے میں اس انداز سے لکھنے کا موقع نہیں ملا۔ اس کی ایک بڑی وجہ یورپ کے وہ سامراجی عزائم ہیں جس کے سامنے میں ہمیشہ سینہ سپررہاہوں۔ آپ نے کمیونسٹ چیلنج کا براہ راست اپنی ٹیکنالوجی اورٹیکنک کے ساتھ مقابلہ کیا ہے خارجی طور پر دفاع کو تقویت بخش کر طاقت کا توازن قائم کر لیا ہے۔کمیونسٹ ریاستوں کے ساتھ آپ کے روابط کی حالت حوصلہ کن ہے روس اور چین کے ساتھ آپ کے تعلقات کا توازن خاص طور پر قابل ذکر ہے۔داخلی طور پر یورو کمیونزم اوراسی قسم کے دوسرے نظام حکومت کے اثرات کی وجہ سے فوجی بغاوت کی اس ’’چیونگم‘‘ سے چھٹکارا حاصل کرنے کا عظیم فیصلہ درپیش ہے۔ جسے ان فوجی ڈکٹیٹروں نے جنم دیا ہے جو قانون کی بحالی کے نام پر حکومتوں کا تختہ الٹتے لیکن لاقانونیت کو رواج دیتے ہیں یہ لوگ آئینی اتھارٹی کو کمیونزم کی دھمکی کے نام پر اختیار کرتے اور خود کمیونزم کی وجوہا ت پیدا کرتے ہیں ان کی پشت پناہی کی وجہ سے یورپ نے خود اپنے اندر تباہی کے بیج بوئے ہیں اور یہی طبعی مساوات میں بنیادی اختلاف ہے ہو سکتا ہے کہ آپ میرے اس خیال سے اتفاق نہ کریں کیونکہ فرانس نے دو غیر معمولی پیشہ ور سپاہی پیدا کئے ہیں جن کی قیادت میں آپ کے ملک کے قابل ذکر ترقی کی۔1۔ نپولین بوناپارٹ2۔ چارلس ڈیگال۔
مذکورہ بالا تیسری دنیا کا اہم ترین مسئلہ ہے لیکن میں فی الحال صرف اپنے ملک کی بات کروں گا وادی سندھ کی تہذیب بڑی قدیم اور پروقار ہے لیکن اس وقت یہ وادی ایک بیمار پانی سے سیراب ہو رہی ہے۔ کہ یہاں کے باشندوں کو خوف اور دہشت کی بہت لمبی راتوں کا سامنا کرناپڑا ہے۔آزادی سے لے کر اب تک یہ ملک تین بارفوجیوں کی حکومت کے تجربے سے گزرا ہے سریاب فوجی بغاوت اس ملک کو پہلی فوجی بغاوت کے دور سے بھی کمزور تر کرتی رہی ہے اگر یہی حادثے بھارت کو پیش آتے تو وہ اب تک تین یا چارٹکڑوں میں تقسیم ہوچکا ہوتا۔جی ہاں لاقانونیت تو ہندوستان میں بھی ہے لیکن وہاں جمہوریت کی جڑیں اتنی گہری ہیں کہ ان کا بڑے سے بڑا سیاستدان بھی ہمارے ڈکیٹروں سے بہتر ثابت ہوتا ہے۔ میں عظیم فتوحات کا امین ہوں اور میری رگوں میں جنگجو بہادروں کا خون دوڑ رہا ہے میں نے دو بار فوجی آمریت کا کامیابی سے مقابلہ کیا ہے اور آخر کار تیسرے میں موت کے گھاٹ اتارے جانے کا حکم پا چکا ہوں۔ لیکن اگر مجھے قتل کیا جاتا ہے تو میرا لہو برصغیر کے نوجوان مردوں اور عورتوں کے چہروں پر ایسی سرخی بن کر ابھرے گا جیسی بہار کے موسم میں فرانسیسی گلاب کی پتیوں میں ہوتی ہے۔
میں پندرہ سال کی عمر سے آزادی کے لئے غیر متزلزل جنگ لڑ رہا ہوں میں نے نہرو اور قائداعظم کے شانہ بشانہ کام کیا ہے میں نے ڈیگال کو ان کے عروج کے زمانے میں دیکھا ہے مجھے ما?زے تنگ کی عزت کا شرف بھی حاصل ہوا ہے میری سیاست رومانس اور شاعری کا امتزاج ہے۔ میں نے آج تک سوائے عوام کے کسی سے محبت نہیںکی۔ اسی لئے میں یہ سمجھتا ہوں کہ عوام طاقت کا سرچشمہ ہیں یہ کوئی سیاسی سلوگن نہیں بلکہ میرا غیر فانی استعارہ ہے۔چاہے مغرب کی خود غرض طاقتیں اور مشرق کے اندھے خواہش مند انسان کو تیسری جنگ عظیم کے دہانے پر لے جائیں انسان اس چتا کے جشن کی راکھ سے اور بھی زیادہ طاقتور ہو کر ابھرے گا۔ سب سے زیادہ خوبصورت بات یہ ہے کہ ایک مرے ہوئے شخص کے لئے مرنے میں فتح سمجھی جائے گی اور مرنے والے کی قبر سے فتح و نصرت کے پھول اگیں گے۔لہٰذا مسٹر پریذیڈنٹ اگر میں زندہ رہا تو میں ہرحال میں اپنی جدوجہد جاری رکھوں گا خواہ اس کے لئے مجھے کتنی بھی بڑی سے بڑی قربانی دینی پڑے۔ عوام کی بھلائی کے لئے میری مقاصد کے حصول کی خاطر میرے خاندان کو ناقابل برداشت حالات کا سامنا کرنا پڑ رہا ہے۔جہاں تک اس علاقہ میں ہونے والی حالیہ تبدیلیوں کا تعلق ہے تو میرے خیال میں ان پر بحث کرنے سے پہلے ان خطرات کا ذکرزیادہ ضروری ہے کہ جن کا پاکستان کواندرونی طور پر سامنا ہے پاکستان کو اندرونی خطرات سے بچانا پہلی ضرورت ہے۔ بہ نسبت خود کو کسی نئے یا پرانے یا نئے اور پرانے ہر دن خطرے سے آگاہ کرنے کے دوسرے الفاظ میں پہلے کام پہلے۔آپ کے ملک سے میری محبت کو بھی آپ جانتے ہیں اور آپ سے متعلق میں جو تعریفی جذبات رکھتا ہوں انہیں بھی آپ جانتے ہیں اگر میں زندہ رہا تو ہم بلاشبہ انسانیت کی بھلائی کے اقدامات سے حاصل ہونے والی خوشیاں مشترکہ طور پر محسوس کریںگے۔لیکن اگر میں مارا جاتا ہوں تو میں آپ کو دوبارہ ملنے تک کے لئے اس دعا کے ساتھ خدا حافظ کہتا ہوں کہ میرے ملک کے لوگوں کو مفلسی، بے بسی، بے کسی اور بھیک مانگنے سے بچانے کے لئے جو پیش رفت ہم نے کی تھی اس کو پایہ تکمیل تک پہنچانے کے لئے بہتر لوگ آئیں۔’’قاتل قرار دیئے شخص کی حیثیت سے میں اتنی ہمت نہیں رکھتا کہ میں آپ کو دوست کہوں۔
سمندر جیسی وسیع عزت اور گہرے لگائو کے ساتھ
ذوالفقار علی بھٹو ‘‘
پاکستان پیپلز پارٹی آج کے قائدین کی عوام کش پالیسیوں کے باعث عوام میں راندہ درگاہ ہوچکی  ہے۔ پارٹی میںسٹیس کو برقرا رہا تو کبھی عوام کا اعتماد حاصل نہیں کر سکے گی ۔ جیالے آج اپنے عظیم قائد شہید ذولفقار علی بھٹو کی سالگرہ پر بھٹوز کے مشن کی تکمیل کاعہد کریں اور  پارٹی کو عوامی نفرت کا نشانہ بنانے والوں سے نجات حاصل کرلیں تو ایک بار پھر عوام کا اعتماد حاصل کیا جا سکتا ہے ۔

Column Name

Matloob

Warraich

Matloob

Warraich

Matloob

Warraich

ADDRESS

QUICK LINKS

Newsletter