Matloob Warraich

خامنہ ای :جس دھج سے کوئی مقتل میں گیا

Dated: 07-Jul-2026

ایران کے سابق روحانی پیشوا آیت اللہ علی خامنہ ای کو اسرائیل اور امریکہ کے مشترکہ حملے میں 28 فروری 2026ء کو شہید کر دیا گیا تھا۔ اس حملے میں ان کی اہلیہ، ایک بیٹی اور ایک نواسا بھی جامِ شہادت نوش کر گئے، جبکہ ان کے ممکنہ جانشین مجتبیٰ خامنہ ای شدید زخمی ہوئے۔ کئی ماہ تک زیرِعلاج رہنے کے بعد وہ بتدریج صحت یاب ہوئے۔شہادت کے چار ماہ سے زائد عرصہ گزرنے کے بعد آیت اللہ علی خامنہ ای کی آخری رسومات کے آغاز کا باضابطہ اعلان کیا گیا۔ ان تقریبات کا آغاز 3 جولائی سے ہوا، جبکہ 4 جولائی کو ان کا جسدِ خاکی تہران میں عوام کے آخری دیدار کے لیے رکھا گیا، جہاں لاکھوں افراد اشک بار آنکھوں کے ساتھ اپنے رہبر کو الوداع کہنے پہنچے۔تجہیز و تکفین کی مرکزی تقریبات تہران کے عظیم مذہبی و ثقافتی مرکز امام خمینی مصلیٰ سے شروع ہوئیں۔ ہزاروں سوگواروں کی موجودگی میں خامنہ ای کا تابوت مرکزی ہال میں لایا گیا، جہاں قرآن خوانی، مرثیہ خوانی اور دعاؤں کا سلسلہ جاری رہا۔ یہ سات روزہ تقریبات 9 جولائی تک جاری رہیں گی اور اسی روز انہیں مشہد میں امام رضاؑ کے روضۂ اقدس کے احاطے میں سپردِ خاک کیا جائے گا۔
یہ تقریبات صرف ایران تک محدود نہیں رہیں بلکہ عراق کے مقدس شہروں میں بھی تعزیتی اجتماعات، مجالس اور دعائیہ تقریبات منعقد کی جا رہی ہیں۔ ان سات روزہ رسومات کے انعقاد کے لیے پاسدارانِ انقلاب، سیکیورٹی اداروں، بلدیاتی انتظامیہ اور مختلف سرکاری محکموں کو کئی ہفتے پہلے ہی متحرک کر دیا گیا تھا۔3 جولائی، یعنی رسومات کے پہلے روز سے ہی دنیا بھر سے سرکاری اور غیر سرکاری وفود کی تہران آمد کا سلسلہ شروع ہو گیا، جو توقع ہے کہ 9 جولائی، تدفین کے دن تک جاری رہے گا۔ پاکستان کی جانب سے فیلڈ مارشل سید عاصم منیر نے رسومات میں شرکت کی، جبکہ وزیراعظم شہباز شریف کی سربراہی میں ایک علیحدہ وفد بھی اظہارِ تعزیت کے لیے تہران پہنچا۔
صدر مسعود پزشکیان، پارلیمنٹ کے اسپیکر محمد باقر قالیباف اور عدلیہ کے سربراہ غلام حسین محسنی اڑہ ای سمیت ایران کی اعلیٰ قیادت نے عوام سے ان تقریبات میں بھرپور شرکت کی اپیل کی۔ اس اپیل کے بعد ملک بھر سے زائرین کا ایک غیر معمولی سیلاب تہران کا رخ کر رہا ہے۔تہران میں تقریبات کی نگرانی کرنے والے پاسدارانِ انقلاب کے کمانڈر بریگیڈیئر جنرل حسن زادہ کے مطابق حکام کو ایک کروڑ بیس لاکھ سے ایک کروڑ پچاس لاکھ افراد کی شرکت کی توقع ہے، جبکہ بعض اندازوں کے مطابق یہ تعداد دو کروڑ تک بھی پہنچ سکتی ہے۔
ایرانی حکام نے 1989ء میں امام خمینی کی تدفین کے موقع پر پیش آنے والے افسوسناک واقعات کو بھی پیشِ نظر رکھا ہے، جب غیر معمولی ہجوم کے باعث افراتفری مچ گئی تھی، متعدد افراد جان کی بازی ہار گئے تھے اور بالآخر جنازے کو ہیلی کاپٹر کے ذریعے ہجوم سے نکالنا پڑا تھا۔ اسی تجربے کی روشنی میں اس بار غیر معمولی حفاظتی اور انتظامی اقدامات کیے گئے ہیں تاکہ کسی ناخوشگوار صورتِ حال سے بچا جا سکے۔زائرین کی خدمت کے لیے ہزاروں خدمتی مراکز اور استقبالیہ کیمپ قائم کیے گئے ہیں، جن کی رجسٹریشن اور انتظامات پہلے ہی مکمل کیے جا چکے ہیں۔ دس لاکھ سے زائد افراد کی عارضی رہائش کا بندوبست کیا گیا ہے، جبکہ تہران کے مرکزی علاقوں میں ہجوم کی محفوظ اور مسلسل نقل و حرکت برقرار رکھنے کے لیے خصوصی شہری راہداریوں اور ٹریفک پلان پر بھی عمل درآمد کیا جا رہا ہے۔
اسرائیل کی جانب سے، امریکہ کی حمایت کے ساتھ، علی خامنہ ای پر حملہ کیا گیا، جس میں ان کے خاندان کے بعض افراد شہید ہوئے اور فوج کے جرنیل بھی شہادت کے رتبے پر فائز ہوئے۔ ایران نے جواب میں جو کچھ اس سے ممکن تھا، کرنے کی کوشش کی، تاہم اس طرح کا بدلہ نہیں لیا جا سکا جس انداز سے اسرائیل کی جانب سے یہ کارروائیاں کی گئی تھیں۔علی خامنہ ای کے بعد، علی لاریجانی، جو قومی سلامتی کے مشیر تھے اور ان کے بعد سب سے طاقتور شخصیت سمجھے جاتے تھے، انہیں بھی شہید کر دیا گیا تھا۔
آج کی ایرانی قیادت، یعنی قالیباف اور وزیرِ خارجہ عباس عراقچی، کو بھی جان کا خطرہ تھا، لیکن ان پر حملہ اس لیے نہیں کیا گیا کہ وہی مذاکرات کرنے والے تھے۔ پاکستان نے بھی امریکہ سے کہا تھا کہ ان پر حملہ نہ کیا جائے، ورنہ مذاکرات کے لیے کوئی مؤثر قیادت باقی نہیں رہے گی۔علی خامنہ ای کی آخری رسومات کے موقع پر بھی یہ خدشہ موجود تھا کہ امریکہ یا اسرائیل ایرانی قیادت کو نشانہ بنا سکتے ہیں، خصوصاً مجتبیٰ خامنہ ای کے بارے میں بیرونی دنیا میں کسی کو معلوم نہیں کہ وہ کہاں ہیں۔ لہٰذا ایرانی حکومت نے فیصلہ کیا کہ دشمن کی ٹریکنگ اور نگرانی سے بچنے کے لیے مجتبیٰ خامنہ ای منظرِعام پر نہیں آئیں گے، اسی لیے وہ اپنے والد کی آخری رسومات میں بھی شرکت نہیں کریں گے۔
علی خامنہ ای کی اہلیہ کے بھائی، حسن خجستہ باقرزادہ، نے ایک ٹی وی پروگرام میں رہبر کی دوسری بیٹی کے لیے دعا کی اپیل کی۔ ان کا کہنا تھا کہ وہ گویا صحرا میں تنہا اور اکیلی پڑی ہوئی ہیں۔ تاہم انہوں نے ان کی چوٹوں یا جسمانی حالت کے بارے میں مزید کوئی تفصیل بیان نہیں کی، جس کے باعث خاندان کے بعض افراد کی صحت کے حوالے سے قیاس آرائیاں مزید بڑھ گئی ہیں۔علی خامنہ ای کے چار بیٹوں کے علاوہ دو بیٹیاں بھی تھیں۔ ان کی بیٹی، بشریٰ خامنہ، پہلے ہی حملے کے روز جاں بحق ہو گئی تھیں۔ اس لیے مبصرین کا خیال ہے کہ حسن خجستہ باقرزادہ کا اشارہ غالباً ہدیٰ خامنہ ای کی جانب تھا، جن کے شوہر، مصباح الہدیٰ باقری، بھی اسی روز جاں بحق ہوئے تھے۔اہم بات یہ ہے کہ علی خامنہ ای کی تجہیز و تکفین اور تدفین کے بعد ان کی وصیت کے منظرِ عام پر آنے کے بھی امکانات ہیں۔ ابھی تک ان کی وصیت سامنے نہیں آئی۔
عموماً ایسا ہوتا ہے کہ عالمی شخصیات کی آخری رسومات میں دنیا بھر کی بڑی شخصیات ایک ہی دن، ایک ہی موقع پر اور ایک ہی جگہ پر جمع ہو جاتی ہیں، لیکن ایران نے اس مرتبہ مختلف انتظام کیا ہے۔ دنیا کے وہ سربراہان جو ان رسومات میں شرکت کرنا چاہتے ہیں، ان کے لیے ایک ہی دن مقرر کرنے کے بجائے مختلف دنوں میں دعوت دی گئی ہے۔ علی خامنہ ای ایک دلیر اور جرأت مند شخصیت تھے۔ انہیں معلوم تھا کہ دشمن حملہ کر سکتا ہے۔ علی لاریجانی نے جا کر ان سے درخواست کی تھی کہ وہ اپنا ٹھکانہ تبدیل کر لیں، لیکن انہوں نے دشمن کے خوف سے اپنا مقام تبدیل کرنے سے انکار کر دیا۔ انہوں نے کہا:’’کیا میری طرح ہر ایرانی بھی اسی طرح محفوظ ہے، جس طرح آپ مجھے محفوظ کرنا چاہتے ہیں؟‘‘ پھر فرمایا:’’جس طرح عام ایرانی رہتے ہیں، میں بھی اسی طرح رہنا چاہتا ہوں۔‘‘
جس انداز سے ان کی تدفین کی جا رہی ہے، اور جس طرح دنیا بھر سے، خصوصاً ایران کے گلی کوچوں، بستی بستی اور شہر شہر سے لوگ ان کی جرأت کو سلام اور عقیدت پیش کرنے کے لیے آ رہے ہیں، اس پر یہ اشعار صادق آتے ہیں:
جس دھج سے کوئی مقتل میں گیا، وہ شان سلامت رہتی ہے
یہ جان تو آنی جانی ہے، اس جاں کی تو کوئی بات نہیں
گر بازیِ عشق کی بازی ہے، جو چاہو لگا دو، ڈر کیسا
گر جیت گئے تو کیا کہنا، ہارے بھی تو بازی مات نہیں
گو کہ ایران اور امریکہ کے مابین جنگ بندی ہو چکی ہے یادداشت پر بھی سائن ہو گئے ہیں۔معاہدے کی طرف پیش رفت کی امید کی جا سکتی ہے یقین سے کچھ نہیں کہا جا سکتا کیونکہ ٹرمپ کہ جو کچھ کہتے ہیں ضروری نہیں کہ اس پر عمل بھی کریں۔60 دن معاہدے کو عملی شکل دینے کے لیے دیے گئے ہیں۔ خدا کرے کہ کامیابی سے معاہدہ ہو جائے۔ پوری دنیا کا امن اسی معاہدے سے وابستہ ہے اس کے ساتھ ساتھ یہ خدشات اپنی جگہ پر موجود ہیں کہ جس طرح اسرائیل کی طرف سے امریکہ کو اسرائیل پر حملے کے لیے پہلے انگیخت کیا گیا اب بھی اسرائیل نہیں چاہتا کہ ایران اور امریکہ کے مابین معاہدہ عملی اور حتمی شکل اختیار کرے۔یوں پہلے کی طرح جنگ کے خطرات موجود ہیں تاہم پہلے بھی جنگ کے شعلے کم کرنے میں پاکستان نے اپنا کردار ادا کیا۔فیلڈ مارشل سید عاصم منیر کی امریکہ اور ایران کی قیادتوں کے ساتھ دوستی کی جڑیں گہری ہو چکی ہیں یہی ایک شخصیت ہیں جو صدر ٹرمپ کو معاہدے کو آخری شکل دینے پر آمادہ کر سکتے ہیں۔

Column Name

Matloob

Warraich

Matloob

Warraich

Matloob

Warraich

ADDRESS

QUICK LINKS

Newsletter