Matloob Warraich

دوہری شہریت گویا’’چوپڑیاں اور دو دو‘‘

Dated: 25-Sep-2012

مطلوب احمد وڑائچ
matloobwarraich@yahoo.com
چند روز قبل حکومت پاکستان نے گستاخانہ فلم "Innocence of Muslims" کے خلاف مذہبی تنظیموں کے احتجاج کی حمایت میں جمعہ 23ستمبر کو یومِ عشقِ رسولﷺ منانے کا اعلان کیا۔ اس فیصلے کو بروقت قرار دیا جا سکتا ہے۔ یومِ عشق رسولﷺ پاکستان میں یومِ تشدد کا روپ دھار گیا۔ اس  دن شرپسندوں نے جہاں اربوں روپے کی املاک کو جلا ڈالا وہیں پولیس کے ساتھ مڈبھیڑ میں تیس افراد بھی ہلاک ہوئے۔ حکومت نے اعلان تو اچھا کیا لیکن خود حکومتی وزیروں،مشیروں اور عوامی نمائندوں نے یہ دن اپنی تفریح میں گزارہ۔ مظاہرین کی قیادت کے لیے قائدین موجود نہ تھے۔ جن مظاہروں کی مذہبی تنظیموں کے رہنمائوں نے قیادت کی وہ پُرامن رہے اور جن میں کوئی سیاسی اور مذہبی جماعت اور تنظیم کا لیڈر موجود نہیں تھا ان میں موجود لوگ بپھرے اور ایک طوفان مچا دیا۔ دنیا کو پُرامن احتجاج کرنے والے تو نظر نہیں آئے شرانگیز کاروائیاں کرنے والوں کو بھرپور کوریج دی گئی۔ ان کی بدولت پاکستان کا امیج بیرونِ ممالک مزید مجروح ہوا۔
جس روز حکومت نے یومِ عشق رسول ﷺ منانے کا اعلان کیا اسی روز سپریم کورٹ نے 11ایم این اے اور ایم پی ایز کو دہری شہریت رکھنے کے باعث نااہل قرار دے دیا۔ ان میں ایک وزیر داخلہ رحمن ملک بھی ہیں جو گو کہ فوری نااہل ہونے سے بزعمِ خویش بچ گئے لیکن ٹیکنیکلی وہ ان سب سے زیادہ نااہل ہوئے ہیں۔ ان کو سپریم کورٹ نے کہا ہے کہ وہ صادق اور امین نہیں رہے۔ آئین کے آرٹیکل 63 اور 62کے تحت کوئی خائن اور جھوٹا شخص پارلیمنٹ کا رکن نہیں بن سکتا۔ رحمن ملک کو 2008ء میں غلط بیانی پر نااہل قرار دیا گیا ہے۔ تاہم انہوں نے رواں سال سینیٹ کی سیٹ سے استعفیٰ دے کر الیکشن لڑا تھا۔ وہ اگر 2008ء میں نااہل ہوئے تو پانچ سال تک وہ پارلیمنٹ کے ممبر نہیں بن سکتے۔ کچھ آئینی ماہرین کا کہنا ہے کہ خائن اور جھوٹا قرار دیا جانے والا شخص تاحیات پارلیمنٹ میں نہیں جا سکتا ہے۔ رحمن ملک کے وکیل نے وہی موقف اپنایا ہے جو یوسف رضا گیلانی کے سپریم کورٹ کے اس فیصلے پر اپنایا تھا جس میں گیلانی کو نااہل قرار دیا گیا تھا۔ بالآخر گیلانی کو نااہلی کا فیصلہ قبول کرنا پڑا شاید رحمن ملک کا انجام بھی گیلانی جیسا ہی ہو۔
میں جہاں کینیڈا میں وطن عزیز سے ہزاروں میل دور بیٹھا یومِ عشق رسولﷺ پر شرانگیز کارروائیوں اور سپریم کورٹ کی طرف سے 11ارکان پارلیمنٹ کو نااہل قرار دیئے جانے پر گوروں کی طنزیہ نظروں سے بچنے کی کوشش کر رہا ہوں جو پاکستان پربجا انگلی اٹھاتے ہیں۔ الیکشن کمیشن کے قواعد و ضوابط اور قوانین کے مطابق دہری شہریت کا حامل شخص الیکشن میں حصہ ہی نہیں لے سکتا۔ انتخابات کے دوران الیکشن کمیشن کے حکام اور اہلکار نہ جانے کن خوابوں اور خیالوں میں کھو جاتے ہیں کہ مکمل سکروٹنی نہیں کرتے۔ جس کے باعث کچھ لوگ چکر چلانے میں کامیاب ہو جاتے ہیں۔ اس پارلیمنٹ کی کیا ساکھ ہو گی جس میں کچھ جعلی ڈگریوں والے اور کچھ دہری شہریت والے موجود ہوں۔ پھر یہ لوگ اہم عہدوں پر بھی فائز ہو جاتے ہیں۔ وزارت داخلہ، وزارت دفاع اور وزارت خارجہ جیسے اہم قلمدان بھی ان کے پاس آ جاتے ہیں۔ ان میں سے کچھ وزیراعظم بھی بن چکے ہیں۔
دہری شہریت کے حامل پاکستانیوں کی تعداد لاکھوں میں ہے۔ ان میں سے اکثر امریکہ، برطانیہ اور کینیڈا میں موجود ہیں۔ امریکہ اور برطانیہ کی شہریت کے لیے جو حلف نامہ دیا جاتاہے اس پر نظر ڈالیں تو آسانی سے واضح ہو جاتا ہے کہ سپریم کورٹ اور محب وطن حلقے کیوں چاہتے ہیں کہ حساس عہدے دہری شہریت والوں کو نہ دیئے جائیں۔
امریکی شہریت کا حلف: میں حلف اٹھاتا ہوں کہ میں امریکی شہریت اختیار کرنے کے بعد امریکہ کے علاوہ کسی بھی ملک، حکومت یا ریاست کے ساتھ کسی قسم کی وابستگی نہیں رکھوں گا۔ میں کسی بھی دوسرے ملک کی شہریت سے دستبردار ہو جائوں گا۔ یہ کہ میں امریکی ریاست، آئین اور قانون کا اندرونی اور بیرونی دشمنوں سے تحفظ کروں گا اور ان کا ہر قیمت پر دفاع کروں گا۔ میں امریکی ریاست، آئین اور قانون کا ہمیشہ وفادار رہوں گا۔ میں قانون کی آواز پر لبیک کہتے ہوئے امریکہ کے دفاع اور تحفظ کے لئے ہتھیار اٹھائوں گا۔ میں قانون کی آواز پر لبیک کہتے ہوئے امریکی افواج میں غیر فوجی خدمات کی ادائیگی کے لئے ہمہ وقت دستیاب ہوں گا۔ میں سول حکومت کی ہدایت پر ہر قسم کا قومی فریضہ سرانجام دینے کے لئے دستیاب ہوں گا۔  میں بقائمی ہوش و حواس اپنی آزادانہ مرضی سے یہ حلف اٹھا رہا ہوں اور اس حلف کے مندرجات سے پہلو تہی کرنے کا کوئی ارادہ نہیں رکھتا۔ خدا میرا حامی و ناصر ہو۔ 
برطانوی شہریت کا حلف: میں پوری سنجیدگی اور خلوص نیت سے حلف اٹھاتا ہوں کہ برطانوی شہریت اختیار کر کے میں برطانوی قوانین کی پاسداری میں ملکہ برطانیہ الزبتھ دوئم اور شاہی خاندان کا وفادار رہوں گا۔ میں برطانوی ریاست کا وفادار رہوں گا اور اس کے حقوق و فرائض اور آزادی کی عزت، حفاظت اور احترام کروں گا۔ میں برطانیہ کی جمہوری روایات کو مقدم اور سربلند رکھوں گا۔ برطانوی شہری کی حیثیت سے میں برطانوی قوانین پر مکمل عملدرآمد کروں گا اور اپنے فرائض غفلت کا مرتکب نہیں ہوں گا۔ 
امریکہ سے وفاداری اس کی خاطر بندوق اٹھانے اور ملکہ برطانیہ کی غلامی کا حلف دینے والے سے پاکستان سے وفاداری کی کیا امید رکھی جا سکتی ہے۔ بعض ممالک تو اپنے شہری کے لیے کسی دوسرے ملک کی شہریت حاصل کرنے پر اس کی شہریت سرے سے ختم کر دیتے ہیں۔ بھارت بھی ان ممالک میں شامل ہے۔ تمام عرب ممالک کسی غیرملکی کو پوری عمر گزارنے پر بھی اپنی شہریت نہیں دیتے جو ملک دوسرے ملک کے شہریوں کو شہریت دیتے ہیں وہ اصل میں ان کی وفاداریاں خریدتے ہیں۔ آج کچھ لوگ بڑے دلائل کے ساتھ بات کرتے ہیں کہ بیرونِ ممالک موجود پاکستانی زرمبادلہ پاکستان بھیجتے ہیں وہ کسی پر احسان نہیں کرتے۔ لاکھوں پاکستانیوں میں مشکل سے چند ہی ہوں گے جو وطن کی محبت میں پائونڈ ،ڈالر ،درہم او رریال پاکستان بھیجواتے ہیں۔ اکثر اپنے اہل خانہ کی کفالت اور جائیدادیں خریدنے کے لیے رقوم ارسال کرتے ہیں۔ جو بیرون ممالک دولت کما کر امارت کی عروج کو چھو لیتے ہیں ان میں سے اکثر کو دھن دولت کے زور پر سیاست میں آنے کا شوق چڑھتاہے۔ وہ دہری شہریت رکھتے ہوئے پاکستان میں سیاست کرتے ہیں۔ حالانکہ قانون کا تقاضا ہے کہ وہ دوسرے ملک کی شہریت چھوڑ دیں۔ اپنے وطن کے لیے کچھ تو ایثار کا مظاہرہ کریں۔ چوپڑیاں اور دو دو پر مُصر نہ رہیں۔
رحمن ملک کو نااہل قرار دیا گیا تو انہوں نے کہا کہ پارلیمنٹ میں کچھ اور لوگ بھی دہری شہریت رکھتے ہیں۔ انہوں نے دہری شہریت چھپا رکھی ہے۔ سپریم کورٹ نے کارروائی محض چند ایک کے خلاف کی۔ سپریم کورٹ کے سامنے نااہلی کے جتنے کیس آئے اس نے ان پر فیصلہ کر دیا۔ رحمن ملک کو جن لوگوں کی دہری شہریت کا علم ہے انہوں نے عدالت کو اس حوالے سے آگاہ کیوں نہیں کیا؟ محض الزام لگانا مناسب نہیں ۔

Column Name

Matloob

Warraich

Matloob

Warraich

Matloob

Warraich

ADDRESS

QUICK LINKS

Newsletter