Matloob Warraich

بکل دے وچ چور!

Dated: 24-Mar-2015

مطلوب احمد وڑائچ
matloobwarraich@yahoo.com
گذشتہ چند روز سے ملکی سیاسی افق پر جو تغیرات رونما ہوئے ہیں انکی سیاسی حرارت سے وطن عزیز کا پورا نظام تبدیل ہوتا نظر آ رہا ہے پچھلے نو دس ماہ سے تحریک انصاف اور عوامی تحریک کی پاکستان مسلم لیگ ن کے ساتھ جو سیاسی کشمکش چل رہی تھی جس نے بعدازاں تحریک اور انقلاب مارچ کا روپ دھار لیا تھا کے اثرات برآمد ہونا شروع ہو گئے ہیں گذشتہ روز تحریک انصاف اور ن لیگ کی قیادت نے ایک مشترکہ پریس کانفرنس کرکے ملکی سیاست میں سرپرائز دینے کی جو کوشش کی ہے اسکے نتائج آنے میں شاید دیر لگے مگر میں نے عوامی تحریک کے چیئرمین ڈاکٹر طاہر القادری سے پچھلے سال جون میں پاکستان جانے سے قبل ہی کہہ دیا تھا کہ عمران خان اپنی ناپختہ تجربہ کاری کی وجہ سے شاید زیادہ دیر آپکے ساتھ نہ چل سکے اور اسلام آباد دھرنے کے عین درمیان ہونیوالے واقعات نے ثابت کر دیا تھا کہ عمران خان کے ساتھ شامل ہونے والی سیاسی قیادت اقتدار کیلئے کوئی بھی راستہ اور کسی بھی حد تک جانے کو تیار ہے۔ قارئین! آپ گذشتہ سال دھرنے کے ابتدائی ایام کے اخبار اور میڈیا فوٹیج نکال کر دیکھ لیں کہ عمران خان صاحب کی ابتدائی ڈیمانڈز کیا تھیں۔ نواز شریف‘ شہباز شریف کے استعفے‘ اسمبلیوں کو تحلیل کرنا کرپٹ سیاست دانوں کا احتساب اور الیکشن کا بائیو میٹرک سسٹم کا نفاذ ابتدائی مطالبات میں شامل تھا مگر جب امپائر خاموش تماشائی بنا رہا تو عمران خاں اور انکے ساتھیوں کی نظریں اٹھی ہوئی انگلی تلاش کرتی رہیں لوگوں کا جوش و خروش دن بدن کم ہوتا چلا گیا جس کا احساس ہونے پر عمران خان نے احتجاج کو ملک گیر بنانے کیلئے ملک کے دیگر بڑے شہروں میں جلسوں کا اعلان کر دیا مگر یہ سب کچھ اپنے قریبی حلیف ڈاکٹر طاہر القادری کو اعتماد میں لئے بغیر کیا گیا ڈاکٹر صاحب نے نئی صورتحال کو بھانپتے ہوئے عمران خاں کا مزید آلہ کار بننے سے انکار کر دیا کیونکہ اس مشترکہ تحریک میں پاکستان عوامی تحریک اور منہاج القرآن کے بتیس افراد شہید ہو چکے تھے۔ ایک ہزار کے قریب کارکن شدید زخمی ہو چکے تھے مختلف اوقات میں بائیس ہزار کارکنان پر مقدمات قائم کرکے جیل اور کچہری کے چکر میں ڈال دیا گیا تھا جبکہ چشم فلک نے دیکھا کہ اسلام آباد کا دھرنا جس میں عوامی تحریک کے ایک لاکھ سے زائد نظریاتی کارکن دھرنے کا بھرم قائم رکھے ہوئے تھے جبکہ عمران خاں کا شام آٹھ بجے سے رات بارہ بجے تک صرف ایک میوزیکل شو منعقد ہوتا تھا۔
چند راتوں کو چھوڑ کر شب ایک بجے عمران خاں اور پی ٹی آئی کی قیادت بنی گالہ روانہ ہو جاتی تھی اور آج بھی عمران خاں کے وہ الفاظ کانوں میں گونج رہے ہیں تیس اور اکتیس کی درمیانی شب اگر عوامی تحریک کے کارکنان سکیورٹی اور تحفظ فراہم نہ کرتے تو شاید ملکی تاریخ کا بدترین حادثہ رونما ہو چکا ہوتا اور بعدازاں انہی عوامل کی بنیاد پر ڈاکٹر طاہر القادری صاحب نے دھرنا چھوڑ کر ملک گیر احتجاج کا پروگرام تشکیل دیا جبکہ عمران خاں اس کو مزید چھپن دن تک برداشت کرتے رہے اور تب حالات یہ ہو چکے تھے کہ تین سو سے پانچ سو تک پی ٹی آئی کے کارکنان دھرنے میں شریک ہوتے تھے اس سے پہلے کہ عمران خاں اور ڈاکٹر طاہر القادری کو ملک گیر سطح پر ہونیوالے احتجاج کے نتیجے میں کوئی اچھی خبر سنائی دیتی کسی نامعلوم اور خفیہ ہاتھ نے سانحہ پشاور برپا کر دیا جس کو بنیاد بنا کر عمران خاں صاحب نے دھرنے کے اختتام کا اعلان کر دیا اور ان کے مطالبات کی فہرست سکڑ کر جوڈیشل کمیشن کے قیام پر آکر رک گئی قارئین! میں نے گذشتہ روز ڈاکٹر طاہر القادری سے پوچھا کہ پی ٹی آئی اور مسلم لیگ ن کے درمیان ہونیوالے اس نئے معاہدے کو آپ کس نظر سے دیکھتے ہیں تو ڈاکٹر صاحب نے ایک مشفقانہ مسکراہٹ کیساتھ مجھے کہا کہ مطلوب میں تمہیں ایک واقعہ سناتا ہوں کہ کچھ سال قبل میں منہاج القرآن کے قریب گارڈن ٹاؤن کی روڈ سے گزرتا تھا جہاں سڑک کے دونوں اطراف پٹھان قالین لٹکائے بیٹھے ہوئے تھے ایک دن مجھے خیال آیا کہ یورپ میں منہاج القرآن کے ایک مرکز کیلئے کچھ قالین بھجوا دوں میں نے گاڑی روکی اور قالین دیکھنا شروع کئے کچھ پسند آئے لیکن انکی قیمتیں آسمان سے باتیں کر رہی تھیں مگر ایک لمبی بحث اور تکرار کے بعد وہی قالین جس کا پٹھان دس ہزار فی عدد مانگ رہا تھا پندرہ سو میں دینے کو تیار ہو گیا ڈاکٹر طاہر القادری سے یہ لطیفہ نما واقعہ سن کر میں محظوظ ہوا اور سمجھ گیا کہ اس دفعہ نواز شریف نے ’’پٹھان‘‘ کیساتھ ایک لمبی بحث و تکرار کے بعد ہاتھ کر دیا ہے۔ حکومت اور تحریک انصاف کے درمیان طے پانے والے اس معاہدے کا اعلان شاید اس سے مختلف نہ ہو کہ انتہائی حالات میں نواز شریف حکومت ایک یا دو سیٹوں کی قربانی دیکر پانچ سال پورے کر جائے جبکہ پاکستان عوامی تحریک کا اس معاہدے پر آفیشل ردعمل یہ ہے کہ الیکشن میں دھاندلی ہمارا ایشو ہی نہیں تھا ہماری تحریک کا مقصد تو نظام بدلنا اور سسٹم میں انقلاب لانا ہے اور اب ان مقاصد میں شہدائے سانحہ ماڈل ٹاؤن اور انقلاب مارچ کے شہدا کیلئے حتمی انصاف کا حصول شامل ہو گیا ہے اور جب تک شہداء کا قصاص لے نہیں لیا جاتا تب تک کسی اور نقطے پر مذاکرات اور مفاہمت تو درکنار ہم لفظ اور ایک انچ بھی آگے نہیں بڑھ سکتے۔ قارئین! گذشتہ چند دنوں کے درمیان ایم کیو ایم کے صولت مرزا اور پیپلز پارٹی کے عزیز بلوچ نے جو اعترافات کئے ہیں یہ ابھی فلم کا ٹریلر چلا ہے آگے آنیوالے چند دنوں میں ایم کیو ایم‘ پیپلز پارٹی‘ اے این پی‘ مسلم لیگ ن کی صفوں سے ایسے بے شمار خودکش برآمد ہونگے جو ملکی سیاست کو یک لخت بدل کر رکھ دینگے ’’بکل کے یہ چور‘‘ پاکستان پر حکمرانی کرنیوالی ان تین چار سیاسی جماعتوں میں اکثریت میں پائے جاتے ہیں اور پاک فوج نے اب یہ تہیہ کر لیا ہے کہ وطن عزیز کو کرائم اور دہشت گردی سے پاک کر دیا جائیگا اور اس میں بکل کے یہ چور مرکزی کردار ادا کرینگے۔
24مارچ2015ء

Column Name

Matloob

Warraich

Matloob

Warraich

Matloob

Warraich

ADDRESS

QUICK LINKS

Newsletter